主頁 >即時策略 > 2我幫你拆
即時策略
A A A

【牛熊搏擊】好友上演爆淡倉(JAN 11)

2017-1-11 1:39:23

牛熊搏擊

自從去年12月底開始大挾淡倉以來,恒指累計升幅已達1200點。噚日指出恒指升至22600水平,受制於去年10月以來嘅下降阻力,如果不日內未能往向上突破,就要出現回吐。話口未完,噚日就成功升穿阻力,仲好叻另咁以全日最高位22744點收市,再升多186點。
噚日恒指升穿埋22740,結果強制收回咗11隻熊仔,相等於853張期指。不過散戶錢多又再入市為熊仔補倉,熊仔錄得5117萬元淨流入,令到總街貨不跌反升,再增452張至9783張期指。而牛仔就有1994萬元淨流出,街貨減少咗182張降至9556張期指。牛熊一加一減,搞到熊仔街貨仲多過牛仔,咁即係大戶話你知,追殺熊仔遊戲仲要繼續玩。
大市升唔停其中一個原因,係牛仔街貨被越拉越遠,500點之內基本上係無牛狀況,淡友想反攻都殺到鬼咁遠先有牛可殺,自然唔同熊仔只要升百幾點就可以殺幾百張期指咁好玩,所以大戶都側重晒去追殺熊為主。之不過明日會有一批22400牛上市,後日連22500牛仔都有,估計該批牛仔上市後可以扭轉番近日近價牛熊平衡嘅情況,不過要轉番淡,睇嚟都要等到下星期先得。
既然話明要向上殺熊,不如睇睇今日熊仔有邊幾個重倉位要留意下,22801熊有519張期指把守,由於太貼價都差唔多可以講係穩死,至於升多百零點,22900熊仔又有689張把關,升百零點應該難度唔高,至於大關23000熊亦有632張期指把關。即係話今日如果升160點升穿22900,好友就可以收回1300張期指嘅熊仔,一旦好彩啲升夠260點,升穿埋23000點嗰大位,恭喜晒一次過幫2000張期指嘅熊仔「收皮」。若然真係升至23000,好多技術指標將升至接近超買區,估計高位又要再反覆吓。

相關評論

相關評論