主頁 >即時策略 > 1即市策略
即時策略
A A A

【股場放大鏡】歐陽風:周二6新股 3隻有得搞

2019-7-18 9:47:41

股場放大鏡

雖然招股撞正巨型股百威亞太(01876.HK)抽走唔少資金,但是周二掛牌的6隻新股,竟然有5隻升得1隻跌,在超購唔多,部份更加僅足額認購之下,表現遠勝預期。幾隻新股,從首日表現可以捉路玩唔玩得過。

泰國IT企業Platt Nera(01949.HK)首掛高開逾38%報1.73元,最高見1.77元,全日收報1.55元,較上市價1.25元升24%,為表現最佳新股,此股超購13倍,算是呢期認購反應較好一隻,而且市值得5億,周三回吐一成,可以候低收集。

採購及銷售IC產品的康特隆(01912.HK)收報0.69元,較定價0.65元,升6.2%,不過此股是高開0.88元或35%後掉頭車落近全日低位收,即是全日任何時段在街外買貨都要輸,一街蟹貨之下,短期幾難炒得起,周三跌落招股價,意料之中。

中港眼鏡製造商恒發光學(01134.HK)收報1.06元,較定價1元漲6%,由於也是開市價1.29元勁升29%,之後全日被狂車,與康特隆一樣短期唔使點睇。大型電鍍工業園區發展商及營運商金茂源環保(06805.HK),股價高開1.5%報1.35元,隨後反復下跌,全日收報1.3元,較上市價1.33元跌2.26%,此股市值有13億,賣點欠奉,上市後唔炒都唔出奇。

內房中梁控股(02772.HK)掛牌後平開5.55元,一度潛水後全日收報5.95元,較上市價升7.2%,呢隻內房僅足額認購,因此只以近下限價定價,預測PE僅4倍而股息率有10厘,睇數據中梁反而是黑馬,周三升8%,整固後仲有得去。

民辦商科高等教育集團中匯集團(00382.HK)首日收報2.87元,較上市價2.85元升不足1%,超購1.5倍兼有策略投資者Ariana Capital入股7.3%貨,首日表現令人意外,不過首日亦見有收貨格,周三收多一朝便在下午開始炒上。中匯是大灣區最大民辦高等教育機構,由法巴保薦,目前已上市最大幾間教育股都係法巴搞,據稱法巴極為睇好中匯,且暗示首份業績即有喜訊,意味持有到出業績都得,呢啲位可收集。

相關評論

相關評論