主頁 >即時策略 > 我幫你拆
即時策略
A A A

【牛熊搏擊】23000阻力大 好友或要透透氣(JAN 12)

2017-1-12 1:46:41

牛熊搏擊

大市再大挾淡倉,屠熊停不了,恒指噚日一口氣攻上22944點高位,中段雖曾回落至22900點以下,不過尾市又再湧過,最後推上22935點收市,全日勁升190點。
市場上又再有多24隻熊仔打靶,相等於2366張期指數量,雖然有唔少熊仔打靶,不過散戶繼續幫用銀彈幫熊仔補血,熊仔再添1513張新倉,令到全日實質街貨只減少853張,總量略降至8930張。而牛仔就繼續有錢流走,整體上減咗157張倉,不過總數仍然有9399張,令到街貨又再多過熊仔。
表面上牛仔整體上有錢走有減倉,實情係由於唔少貼價牛陸陸續續上市,出現咗唔少轉倉盤,貼價牛倉位急增,其中最貼會嘅22150牛又再增加467張倉位,令到街貨增加至688張。由於大市連日急升,貼價牛越拉越遠,還好今日會有19隻新牛仔上市,最貼市嗰6隻收回價都喺22400之上,明日仲有5隻新牛收回價會喺22500之上,隨著多咗貼價升嘅出現,相信未來幾日都係牛仔換馬嘅高峰期。
噚日好友雖上破多個熊仔重創位,不過大位23000就未能攻破,現時23000絕地熊有654張倉位,算係大倉之一。不過噚晚夜期見開始升唔起,就連美股早段升近百點,夜期都要報跌,唔通今次真係比批23000絕地熊成功反撲?
自去年11月恒指跌穿23000點後,好友先後3次反攻都失敗,今次雖然已挾至23000點關口前,但RSI及STC已升至接近超買區,唔通又係欠臨門一腳?恒指其實已回升至各平均線之上,加上10天線(22303)升穿埋20天線(22151),中期理應向好,最大可能以大漲小回格局往上再推進。由於23000點阻力唔輕再加上超買因素,唔排除大市可能要透透氣,22700點應該係第一站支持,如果調整較深,甚至可能要穿一穿22400點才可以企穩。

相關評論

相關評論

文章搜尋
即時策略