主頁 >即時策略 > 我幫你拆
即時策略
A A A

【牛熊搏擊】十字星待變 一於 穿22500追熊(JAN 10)

2017-1-10 2:43:23

牛熊搏擊

1000000_20170110024145

恒指自今星期打穿22500點後,升勢開始有少少減弱,噚日雖則曾升至22626點近期高位,但最後都無功而還,仲整咗粒十字星收市,似乎待變味道都幾濃。相信唔少炒友都跟筆者一樣,曾預期大市可望挾穿埋22700,結果始終都挾唔上,其實就連22600都唔太企唔住。
今次升市的確係欠缺咗成交配合,以噚日為例,即使再創近期高位都係得嗰513億成交,近期升市中似樣少少成交都係得上星期五一日咁大把,仲只係只勉強突破到600億成交,急升咗成千點都靜成咁,又難怪短期難憧憬再大幅挾上。
過去8日散戶多以追熊仔為主,不過近期有唔少新牛上市,噚日就有7隻較貼價牛仔上咗市,其中4隻22000樓上嘅牛仔就最多人追貨,一日之間街貨量就增加至297張期指,可見貼價牛的確有幾大需求。睇番星期四及星期五陸陸續續會有唔少回收價22200至22400牛仔上市。隨著有新牛供應,估計後市變化會更大。
本來恒指升穿50天線(22460)後企穩,係可以再睇高一線,不過22610剛好係10月以來下降通道嘅頂部,連續兩日升唔穿自然難免令人擔憂,加上噚日所出現嘅十字星待變,如果今日仍未能向上突破,估計要回吐機會頗高,所以建議有牛在手都係高位減減磅好啲。
如果進取啲想搏吓熊仔,可以小注考慮隻恒指高盛熊(65104.HK),留意番隻熊收回價22801都幾貼水吓,只得242點距離所以係高危熊。揀65104係預期當大市跌穿22500時追熊備用,最吸引莫過於68倍嘅槓桿,行使價係22901。噚日輪價收3.3仙,如果大市真係要回番去22000點,65104可升值至9仙,計落數都算吸引,不過買熊只能小注搏一搏,最好係跌穿22500時才追入,升穿22650就止蝕。

相關評論

相關評論