主頁 >週刊內容 > W.T.F
週刊內容
A A A

【W.T.F】有一種零食叫「私密」(第105期)

2017-1-2 10:00:57

wtf2

由於社長成日話濠賭股有幾好有幾好,盈霏聖誕假就同個好姊妹,過咗馬交玩(唔好問我點解冇仔陪),睇吓市道有幾好。經啲馬交friend推介,氹仔嘅巴黎人同永利皇宮二揀一,選擇咗後者,原因係啲房大間啲喎。

永利皇宮堅鬼馬,喺門口整咗個小型吊車(其實都唔細),客人可以坐免費吊車入酒店,而條軌就圍住個湖,有噴水表演,淨氣勢都贏晒。一如馬交friend所云,永利皇宮啲房真係幾大,全間房嘅光暗、空調、窗簾等都係智能控制,更加智能嘅係,佢個mini bar寫明,如果你拎開一款小食或者飲品超過60秒,就會自動入賬,計你食咗或者用咗,係咪好犀利呢?搞到小妹掂都唔敢掂呀。

近年澳門酒店玩土豪味之餘,房入面啲嘢都玩吓設計,好似唔同嘅小食,都分晒一盒盒,井井有條,盈霏作為港女,真係唔開嚟食都要影張相留念。之但係,喺腰果、蝦片、合桃等小食之間,點解有樣嘢叫「私密」?絲襪奶茶就聽得多啫,私密係乜?耶,佢個盒有寫,原來入面係安全套同其他專欄作家渾水成日用嘅嘢,盈霏真係唔知永利皇宮安排「私密」喺埋零食度,係細心定係大膽,如果一家大細入去住,小朋友當普通小食打開咗嚟食咪大件事?

相關評論

相關評論