主頁 >名家專欄 > 股壇串到盡 羅尚沛
名家專欄
A A A

【股壇串到盡】2017必中預測(羅尚沛)(第105期)

2017-1-4 18:00:28

%e8%82%a1%e5%a3%87%e4%b8%b2%e5%88%b0%e7%9b%a12

回顧完,又係例牌一年一度新年新預測,唔好話嚴唔嚴選咁陳腔濫調,總之就係必中。

一、黑天鵝齊集,2017年又係大選年,陣線在歐洲,咁眾所周知歐洲呢幾年都係掙扎於後QE年代,邊個政黨上台都離唔開脫歐、民綷、經濟這幾個議題,究竟歐洲會否因為英國脫歐而變天?美國加息會否令歐債陷入泥沼?總之就係黑天鵝,邊個做德國總理都係黑天鵝,黑天鵝咪chok囉,有幾chok?chok完先馬後炮話你知,基本功啦。

二、中國經濟繼續穩健增長,加大力度供給側改革去產能去庫存、擴大內需唔會停、防止資產泡沫、跟著十三‧五規劃路徑穩中求勝、堅持一帶一路去出去、人民幣沒有貶值,貶都係因為美元升、加快國企改革步伐、把握中國制造2025和工業4.0合作機遇,淘汰落後產能….(麻煩編輯幫手save低呢段,未來10年都可以繼續用)

三、港股方面,利好利淡因素都有,指數會波動,最差情況估計恆指於12000有支持,最好情況相信於42000點有阻力。冇錯,2017年,恆指上下區間將於12000-42000之間。藍籌股方面要注意業績,因為賺得多先派得多,如果派得唔多息,分分鐘美國一加息個股息率就唔馨香了。至於二三線股,炒得嘅會比唔炒得嘅好炒,七八線股方面,唔炒得嘅最好唔好走去炒。

四、美國呢隻黑天鵝2017年繼續估你唔到,事先張揚加息3次可能係假象,實情可能係4次又可能一次都唔加,連耶倫都估唔到自己想點,我地無謂浪費時間。道指在高位已有一段時間,技術因素上如果企唔穩,獲利回吐壓力增加道指隨時一觸即發,此乃高處不勝寒。不過咁,美金強道指強,唔好盡信圖表,記住大戶畫圖散戶睇圖,所有技術因素可以調轉頭解讀,道指有機高處未算高。

五、債務問題困擾全球,解決方法就係制造令一個債務問題。大家都爭過card數,只要有新債冚舊債,債務問題並不是問題。

六、外匯方面,唔直接講,總之明年係旅遊好年份。

七、2017年必勝推介 –香港房地產,香港買樓係無敵的。正所謂「人仔升,有利樓價、人仔跌,有利樓價、美元升,布利樓價、美元跌,有利樓價」,這是小弟follow某高級財演一年的分析得出的結論。希望今年高級財演乃係可以繼續高級,造福苦海股民。

相關評論

相關評論