主頁 >名家專欄 > 股壇串到盡 羅尚沛
名家專欄
A A A

【股壇串到盡】財演金句句句甘(羅尚沛)(第102期)

2016-12-14 18:00:37

%e8%82%a1%e5%a3%87%e4%b8%b2%e5%88%b0%e7%9b%a12

話說好多年前小弟還是股海羔羊之際,曾經聽過一個著名財演的seminar,事後獲益良多,並確認如果要在呢行發光發熱,必定要有十大投資格言,如果冇,真係冇like冇粉絲囉。

那位著名財演十大投資格言中,有幾個points真係堅到爆,「如果指數跌了三分之一,就要小心」,嘩,跌足三份一先識驚,你都好慢喎。「買爆升股好容易,記住上漲三步曲:整固、突破、爆上!」試問邊隻爆升股唔係咁的。

最利害就係「買入的時間是輸贏的關鍵」、「要快狠準」、「要睇清楚形勢,千萬唔好急」咁究竟要快定要慢呢?當時小弟乜都唔識,真係以為呢啲格言係必贏秘訣,牢記於心,多年之後才知道一開始已被那位著名財演老點。

投資格言一如啊媽係女人,觀眾已經唔buy。財演要搵句靚金句去market自己亦唔容易,好多時為咗金句搞到自己低低能能咁真係比比皆是。甚麼「人民幣跌利好消費,人民幣升又利好消費」、「就算升穿23000,都唔好過份樂觀」,聽起上來好似好有道理,諗深一層又是啊媽原來係女人。

如果我係電視觀眾,老老實實,有兩句堅係聽到都「梗」耳,「恒指有波幅,冇升幅」、「摸著石頭過河」,想點先,除咗星期六日公眾假期,邊有一日個指數冇波幅又冇升幅又冇跌幅。又成日聽人講話個波幅滿足唔到個要求,咁你想要幾多咪出聲囉。

做人嘅嘢就日日都摸著石頭過河啦,事後又唔話我聽要摸住邊啲石頭過河,見人跌咗落河先馬後炮,咁係咪老點先?好似偉大的小加總裁咁,你唔知深港通幾時開咪話唔知囉,硬係要好似個智者咁整啲似是而非講完等如冇講嘅隱喻,最後俾人揭出個底牌咪傻豬豬囉。

另外有一句係講就容易做就難,就係「授之以漁」,本來個意思係教你釣魚好過釣埋俾你,教你賺錢方法好過俾冧把你。聽落好偉大,但查實做唔做到呢,就算你堅到可以授之以漁,你啲粉絲見你成日講埋啲乜乜股資秘訣,講來講去一個冧把都冇,即係廢up冇料到啦,到最後咪又係要跪低「受之以魚」。財經金句多到不能盡錄,「個市會好反覆,要縛好安全帶」、「呢隻股細細粒容易食」、「散戶睇圖,大戶畫圖」,細心玩味這些金句,到底有幾多係金石良言發人深省,有幾多係事後孔明固弄玄虛,看官心中有數。

財經節目有兩句係最貼地最應棍的,一句係「我發覺你成日為咗啲衍生工具,而誤導散戶買賣股票,你唔怕有報應咩」,另一講係「我冇持有以上股份」,不過呢啲咁真嘅嘢,永遠唔會係金句囉。

相關評論

相關評論