主頁 >名家專欄 > 股壇串到盡 羅尚沛
名家專欄
A A A

【股壇串到盡】悶市求樂趣(羅尚沛)(第103期)

2016-12-21 18:00:39

%e8%82%a1%e5%a3%87%e4%b8%b2%e5%88%b0%e7%9b%a12

一年365日,總唔能夠叫港股日日都爆上爆落幾千點等你過足癮的。實際上,港股一年有超過一半時間係悶到發霉,唔上唔落,與其對住部報價機發夢,倒不如諗諗有乜好做打發時間。

根據小弟多年股票行dealing 房打滾,從業員打發時間有不同的方法,而用甚麼方法,與年齡的大小有莫大的關係。老一輩的多數會同隔離位打牙骹,話題通常是懷緬幾十年前炒匯豐(00005.HK)啲威水史,又或者係講吓邊個議員被DQ,邊個做特首,非常維園。

到40至50歲那批,以前就最興講移民,仔女入咗邊間名校,鋼琴學到第幾級。依家就通常諗啲不著邊際的發財大計,例如點樣爬大陸水、點樣求其開間公司啤個殼cap水做大富豪,幾十歲人還幻想十足。

到30至40歲那批,一係就打機,一係就睇電影,而根據小弟非正式官方統計,最多人睇嘅就係周星馳和黃子華棟篤笑。

至於20至30歲那群,無論個市悶唔悶,一樣都係FB、聊女仔、睇波…

你會發覺,前線證券從業員對待百無聊賴嘅工作生活,同其他行業係完全不同的。你唔會見到從業員會得閒會去睇多啲學多啲,以前啲sales會睇研究報告、會做剪報、做自己notes,依家資訊發達咗,反而更求其。

記得好多年前小弟開始接觸窩輪都係因為個市悶,而當時合和輪更加係散戶至愛,以前炒輪邊有人計晒引申波幅啊槓桿比率畀你㗎,全部靠feel靠經驗,錢多輪少,隻隻輪都可以炒到㷫烚烚。

依家就唔同了,打開電視報紙,一堆窩輪冧把任你跟,長年期短年期,高槓桿低槓桿,分門別類,真係百貨應百客。但反而身邊朋友越來越少炒輪,何解?因為我哋呢個年紀嘅,總會相信一分耕耘,一分收穫,以前死計爛計個公司估值,再度來度去邊隻輪抵買,工夫係做多十倍,但幾趣更甚,贏咗故然happy,輸咗當交學費。

依家聽聽埋埋去炒,贏係好彩輸就應該。有時見到啲新入行從業員,市悶爛腳,叫佢哋睇吓公司年報,真係睬你都傻。

你睇吓我同大師,悶市幾咁勤力,Candy Crush去到2100關以上,這就是努力的成果,你哋唔恨得咁多。

相關評論

相關評論