主頁 >名家專欄 > 股壇串到盡 羅尚沛
名家專欄
A A A

【股壇串到盡】地產霸權是最好的(羅尚沛)(第106期)

2017-1-11 20:00:08

%e8%82%a1%e5%a3%87%e4%b8%b2%e5%88%b0%e7%9b%a12

無論你係3歲定80歲,只要係香港人一聽到「地產霸權」四個字,都非常之痛恨。當一個本土香港人到了青春期,對前路感到茫然,自不然會怨恨點解投錯胎,冇「成功須父幹」的庇蔭。到中年,在社會浮浮沉沉多年後仍然兩袖清風,自不然又會歸究於「地產霸權」誤其一生。

香港的地產霸權泛指四大家族,包括李嘉誠的長實集團、郭氏家族的新鴻基地產、李兆基的恆基集團、鄭裕彤的新世界集團,長時間壟斷香港的地產命脈,控制供應來牟取不合理的暴利。然後利用地產暴利來沾手其他民生行業,例如超市、電訊、電力等,這就是所謂的「24小時為李嘉誠打工」。

近年地產霸權越來越霸,因為西北發展涉私相授受、劏房越劏越細但就越賣越貴、大地主加租令小商戶無法生存,都令地產霸權一詞更加負面。但實情地產霸權係咪魔鬼?

首先,香港得以由亞洲四小龍進化成國際金融中心,地產霸權居功至偉。當簽了一紙樓宇買賣協議書,你已深知你的一生都要為發展商打工,這就是香港人發奮向上的精神。唔信你可以睇下歐洲人,佢地平平哋可以住到大大哋,租客惡過業主,咪搞到歐洲懶洋洋冇衝勁,淨係識攞福利囉。

其次,好多人話劏房是體現了地產霸權的終極壓迫,咁牛唔飲水又點「撳」得牛頭低呢。獅子山精神進化到今時今日,就係唔好執輸,有買貴冇買錯,幾百萬買層200呎放得張床放唔到個櫃嘅「單位」,今日唔買,下個盤可能連床都放唔落嘛。

更何況,以前叫偽豪宅的都有600呎建築面積,依家啲豪華劏房雖然只有200呎唔夠,但勝在夠溫暖,家庭更加和睦更關心對方,就好似以前置區咁有人情味。呢種香港情懷,唔係發展商利用劏房來得以保留,除時會消失。

至於話地產霸權操縱多種業務,其實只是分散投資,是幫股東賺取最大回報。而瓣瓣都做得咁出色,是皆因管理好,眼光又獨到,並非是財雄勢大,大石紮死蟹的野蠻行為。成日話領展迫走啲小商戶,如果領展係無良嘅,就唔會捐贈剩菜,造福貧苦大眾啦,小商戶交唔起貴租要執笠要怪就怪自己冇本事。如果真係有地產霸權啊,海航就唔會投到兩幅啟德地啦。如果政府偏幫地產商啊,就唔會加完辣再加辣去逼人上車早買早享受啦。總括而言,你認為被地產霸權迫害,其實係你自己仇富。只係萬幾蚊呎用你大半世人工買個劏房擁有自已私人空間都唔滿足,冇人幫到你囉。

相關評論

相關評論