主頁 >名家專欄 > 股壇串到盡 羅尚沛
名家專欄
A A A

【股壇串到盡】又一年(羅尚沛)(第104期)

2016-12-28 18:00:10

%e8%82%a1%e5%a3%87%e4%b8%b2%e5%88%b0%e7%9b%a12

每逢年底例行功事都要回顧一番。先回顧一下今年推介成績,同往常一樣,小弟成年講過估過咁多嘢邊可能會記得,不過今年確實記得在年頭預測過油價係全年best buy,結果係點?如果隻油年頭揸到年尾,真係和味過和味龍。

其餘的推介,是錯是對也好,輸贏也好,小弟一概唔記得了。如果聽小弟講年頭唔買樓,到今日見到樓價升到「把把」聲,唔好打面。如果年頭聽小弟講唔好買匯豐(00005.HK),今日升到65蚊都唔好打面,因為如果股評人錯就要打,恐防閣下會打到斷氣都未打完。

2016年嘅地球同2015年嘅地球一樣,發生了不少爆頭事件,如果要一一回顧,寫多十篇都唔夠。每年咁多事發生,就算當時講到幾咁世界末日,幾咁冇彎轉都好,過多幾個月嘅今日,咪一樣忘記得一乾二淨。

不過有兩個2016現象,如果將兩者串連一齊,可以啟示地球正在出現變化。

其一就是國際政壇變局頻生,菲律賓的杜特爾特、台灣的蔡英文、美國的特朗普,都是以前的世道人心難以預測的結果,但今年通通成為贏家,顯示人心求變。看見特朗普大選勝出,很多人都說美國人瘋了,實情可能是過去圍威喂式政壇派餅仔遊戲大家都看厭了。不要眼見人家求變就說是瘋子,這不叫活在當下,這叫井底之蛙。

其二就是Pokemon go和PPAP瘋魔全球,本來以為可以擺脫上年Gangnam Style的奪命煩音,今年再整一首更加洗腦的PPAP,Pokemon go就更加平地一聲雷,好彩小弟有多年修行才不致墜入深淵。人人沉醉於捉精靈和PPAP旋律,這不叫潮,這叫溫水煮蛙。

有人想變,有人想麻醉自己,自得其樂,就這樣混混噩噩過了2016。

同樣,2016年嘅港股同2015年嘅港股一樣,都係有上有落、有波幅冇升幅,有買貴冇買錯咁囉。今年有兩個人物值得一提,一個就係偉大的港交所行政總裁末小加,佢可以將一個小小深港通搞到登陸月球咁大件事,更加可以將一件佢唔知幾時開通又唔到佢決定幾時開通嘅事,變成乜都好似關佢事兼係佢拍板咁款,呢種作客變主場嘅技巧,好值得後世學習。

另一位就係耶倫,算啦,上半年小弟當佢係寶,下半年就鬧到佢狗血淋頭,為免俾讀者話小弟反轉豬肚,今期鬧少一次。

串下人,又俾人串下,自得其樂,就這樣恆指混混噩噩年頭同年底都係2萬2。

相關評論

相關評論