主頁 >名家專欄 > 知魚之樂 唐牛(逢周二)
名家專欄
A A A

【知魚之樂】港股陰乾如何自處(唐牛)(DEC 20)

2016-12-19 17:34:27

strong-dollar

最唔想見到嘅畫面又出現了!講緊嘅係港股陰乾局面。冇計,美國再次吹起加息風,本港銀行同業拆息全線扯高,用H按供樓嘅,雖然未到封頂水平,但供款明顯增加,彷彿已感受到加息嘅壓力,同一時間,港滙亦開始轉弱,資金疑似流走,加上年結資金趨緊,港股作為提款機嘅角色,易跌難升了。

「今年仲輸緊錢喎,想趁年尾追番呀!」相信呢個係不少戰友嘅心聲,但客觀條件明顯唔就,沽盤較買盤強得多,夾硬亂博只會輸得更慘,更重要係,市況低迷,冇番咁上下心理質素,好容易被震走。都係嗰句,忍一時風平浪靜,退一步海闊天空,2017年再搏殺吧。

當然,作為投資專欄,齋吹冇冧巴只會流失fans,今日講講隻利標(00787.HK),有望成為明年追數之選。點解咁睇好佢?三個字︰美元強!利標於2014年從利豐(00494.HK)分拆出來,8成收入來自美國,有最強勢貨幣落袋,贏在起跑線。公司主打童裝、男女時裝、鞋履配飾及品牌管理,最具睇頭莫過於最後那瓣。點解?原來6月時與美國agent公司CAA設立品牌管理公司,CAA旗下客戶廣泛,又以影視界及體育界最威水,當中包括湯告魯斯、里安納度迪卡比奧、C朗拿度、勒邦占士等,利標有與碧咸及Katy Perry合作嘅經驗,如果再加添名氣,品牌效應更勁。

講到尾,業績同股價有交代最實際,公司中期經營溢利及經營現金流均倍升,加上下半年乃傳統旺季,值得看高一線。股價嘛,業績後由0.85元起步,最高曾見1.27元,近日回調至1蚊邊已跌唔落,剛好亦是調整0.5倍的水平,先下一注無妨。

#知魚之樂 #唐牛

【只要用心,人人都可以係股神!】
https://www.facebook.com/tongcow88

相關評論

相關評論