主頁 >名家專欄 > 知魚之樂 唐牛(逢周二)
名家專欄
A A A

【知魚之樂】母憑子貴概念股(唐牛)(DEC 13)

2016-12-12 17:37:10

river

風水輪流轉,近期政壇股壇皆適用。梁振英終被中央棄用,反映阿爺未能guarantee佢拎到600票,唔夠5年可以得罪咁多人,前無古人。原本三番四次講要退下來嘅林鄭,眼見主要對手冇得留低,冒住被指反口覆舌嘅批評,都重新考慮參選下屆特首,咁樣轉身射個三分波,精甩尾程度不下於梁振英,真正女版689,其實唔係葉劉。

股市資金流同樣大逆轉,強勢多年嘅科網股,在騰訊(00700.HK)創4個月低位下齊齊腳軟,相反鞍鋼(00347.HK)、馬鞍(00323.HK)等繼續破頂,周期股取得階段性勝利,情況會一直延續,抑或只係暫時性,實在冇人估到,短炒只能順勢而行,亦反映操作十分困難。

欄友高明一注獨贏吹起彩星玩具(00869.HK),令人拍案叫絕,同系彩星集團(00635.HK)亦見異動,不妨留意。彩星集團持有彩星玩具49%股權,儼然後者的影子股,跟升可謂順理成章。不過,彩星集團還手持多個工商住項目,包括廣東道彩星集團大廈,冇錯,就係由Apple承租那兒,遇有半山麥當勞道多個單位,及屯門彩星工業大廈。由於地產市道疲弱,加上零售數字差,中期投資物業重估錄得逾2億銀虧損,令業績盈轉虧,但觀乎近期有多宗商廈天價成交,估值止跌回升只係時間問題,彩星集團全年業績翻身可期。

我哋都諗到嘅,管理層點會唔知呢?無怪乎公司再度啟動回購,作價最高9.6元,現價計僅高不足半成,跟住入場有着數,以其手持8億銀彈在手,相當於市值近四成計,抗跌力一流!

#知魚之樂 #唐牛

【只要用心,人人都可以係股神!】
https://www.facebook.com/tongcow88

相關評論

相關評論