主頁 >名家專欄 > 林作‧文 林作
名家專欄
A A A

【林作文】那年聖誕 我差點餓死(林作)(第104期)

2016-12-27 15:00:49

%e6%9e%97%e4%bd%9c

踏入12月尾,節日氣氛越嚟越濃厚,街上面隨處都可以見到聖誕燈飾同埋大大小小嘅聖誕活動。一到夜晚或者假日,大型商場以及維港兩岸就會變得非常熱鬧,一家大細或者熱戀中嘅情侶都會去感受一下冬日聖誕嘅氣氛同熱鬧。

大家可能會好奇,外國嘅聖誕,尤其係作為基督教國家嘅英國,聖誕氣氛會唔會比香港更重,有更多盛大嘅活動呢?其實相反,除咗大城市以外,好多地方都係死城。還記得有一年嘅聖誕我留咗喺牛津,打算好好溫習,結果差啲餓死。點解?基本上,絕大部份嘅人都選擇返屋企,99.9%嘅商店都唔做生意,連餐廳都唔開門(仲勁過農曆新年),唯一屹立不搖係Sainsbury或者Tesco等嘅超級市場。而一直秉持住「君子遠庖廚」理念嘅我又唔太識煮食,結果只能靠乾糧或者即食麵度日,好不悽慘。

不過老實講,如果你問我,聖誕節個幾日我都會prefer好似英國人咁,選擇留喺屋企同家人或者朋友安安靜靜咁度過,順便睇埋英超嘅聖誕快車。其實唔止係聖誕,元旦、復活或者其他大節,(如果有得揀嘅話)我係絕對唔會出去嗰啲所謂節日慶典。原因有二。第一,我真係好討厭去同人逼逼逼。香港地方已經夠細,一去到大時大節,放煙花睇燈飾嘅地方就會變咗萬聖節嘅蘭桂坊,行都行唔郁,環境極度惡劣,完全無氣氛可言。

第二,我一直都唔明白湊熱鬧呢個idea。香港人,總係鍾意流連係各種唔同嘅活動之中。一有啲咩大型節日event出現,就更加要拉埋三五知己一齊去。個人認為,呢個係一種怕蝕底嘅心態。一年先有一次呢啲(聖誕、新年、復活、暑假)限時活動,唔去就好似會miss,Out咗啲重要嘢,加上去完之後又可以同朋友吹噓,邊度邊度嘅活動好好玩,有啲咩係唔可以錯過,然後喺朋友羨慕加崇拜嘅目光中滿足咗自己嘅虛榮感。朋友聽完,基於人去我又要去嘅羊群心態,又拉埋啲兄弟姊妹團一齊去,結果就係香港稍有規模嘅活動都會多人得要命。

以前(被逼)去過唔少香港嘅節日活動,其實都係千篇一律又或者因為地方所限,對比起外國嘅活動時氣氛及內容都大為遜色。假日係應該用嚟好好休息,難得有幾日可以遠離工作好好叉電,點解仲硬要出去同人逼然後仲慘過返工呢?我真係寧願留係屋企睇書好過。其實,毒又有咩好怕喎?

相關評論

相關評論