主頁 >名家專欄 > 林作‧文 林作
名家專欄
A A A

【林作文】畢業季節裡的男朋友(林作)(第102期)

2016-12-14 18:00:09

%e6%9e%97%e4%bd%9c

踏入11、12月,又到咗香港各間大學行畢業典禮嘅時間。同我個大學死黨傾開,發現原來佢女朋友啱啱喺港大畢業,無喺香港行過畢業禮嘅我,當然會好奇下到底同我哋牛津行畢業禮有咩分別。

其實當年我哋嘅畢業禮比較簡單。首先,行禮之前或者之後係自己college同professor以及同屆畢業生食個formal meal,同professor傾下近況前程,又可以跟舊同學聯誼下感情。畢業禮則喺Sheldonian Theatre(謝爾登劇院)舉行,古典得嚟不失簡潔,好快就完成成個典禮。出嚟之後同約好嘅朋友喺出面影相聚舊,始終朋友唔會太多好快影完,搞掂後除咗件畢業袍準備夜晚去「劈」,喪玩一餐。

我死黨嗰日就忙好多。香港呢邊一直有個習慣,畢業嘅同學總會有一隻畢業公仔或者一束花拎住嚟影相,所以我個friend一早就要去預訂好畢業公仔。而在當天接近個半鐘嘅畢業典禮過後,佢首先同(幫)女友同埋佢嘅長輩影相,然後就去同女友嘅朋友去齊港大各個唔同嘅景點影相。而因為女友港大朋友眾多,最終個日由下午一直影到接近7點先走人,我死黨基本上得返半條人命。離開嘅時候仲見到好多畢業生興致勃勃咁繼續影相,認真犀利。

相對之下,雖然英國個邊朋友會比較少無咁熱鬧,但係我仍然比較鍾意個邊嘅簡單嘅慶祝style,而我個freind亦都深表認同,慳錢又慳時間。不過,當我問到個日過得開唔開心嘅時候,佢笑容燦爛咁畀咗個笑而不語嘅樣我。車!講咗大半日幾辛苦幾慘咁原來心底暗暗enjoy緊。哈,古龍先生果然誠不欺我,男人,大半都是天生嘅賤骨頭。不過,子非魚焉知魚之樂,箇中快樂實在不足為我呢種外人所道也。

相關評論

相關評論