主頁 >名家專欄 > 林作‧文 林作
名家專欄
A A A

【林作文】保險迷思(林作)(第106期)

2017-1-11 19:00:21

%e6%9e%97%e4%bd%9c

推銷電話,相信大家耐唔耐都會收到三五七個。收得最多嘅除咗銀行計劃同埋財仔借錢以外,就係保險公司嘅cold call同你推銷保險。依家見到每年保險公司越請越多人,食飯嗰陣又總會有幾個保險朋友同你講下保險點點點重要(又或者係facebook上面散發下正能量,幫到客人有幾開心fighting),究竟保險係咪真係咁值得買呢?咁啱呀媽相熟嘅經紀想搵我傾保險,好,就去親自了解下。

大學讀數,所以聽完保險經紀講完之後點都要返屋企自己計下數,睇下咩plan底啲。計落,最底買始終係醫療意外plan。無他,個leverage夠大,平少少嘅幾千蚊一年,可能入一次醫院七八萬咁已經等於你十幾年嘅保費,抵番晒。加上公立醫院使用率長期爆滿,想睇都無得睇,隨時排個專科都要等於1至2年,所以奉勸如果無公司醫療或者意外保嘅話快啲去自己整返份。

定期人壽?小弟自問工作安全,家中老母又唔使我供養,所以無乜需要。儲蓄人壽?嘩,又要我供咁耐,lock實我啲錢咁多年,仲要利息咁低,擺成10幾20年先double到個數。加上本人要唔知第日生唔生仔,所以都係無乜需要。相信對呢種計劃最感興趣嘅,一定係大陸富商,因為可以合法逃遺產稅(過身後嘅保險賠償唔使計稅)。不過,大陸政府都唔傻,之前禁止大陸客用銀聯卡喺香港買保險可能就係想打壓呢種風氣。

好啦,最後就係最大名(或者臭名)頂頂既投資相連單。聽咗同睇咗好耐,連我都唔可以100%明晒。原因無他,太多各種各樣嘅獎賞,收費同埋計算方法。不過,聽咗咁耐我大體上可以歸立出兩點。第一,我相信世界上每一間公司都係想賺錢嘅。所以如果要經一間保險公司去同基金公司買基金嘅話,我中間一定會畀人抽唔少嘅手續費。要玩長線嘅話,咁我點解唔買隻穩定嘅大公司股票收息同埋博間公司會繼續擴張發展。第二,個經紀係咁講話如果1年賺6%或者9%嘅話20年後有幾多錢。大佬,9個%呀!跟住《港股策略王》買都未必得啦,點信你呀,睇下今年強積金嘅表現其實已經可以略知一二。

老實講,我認為保險業最黃金嘅時期已經過去。隨住保險從業員人數不斷上升,但香港同埋大陸市場持續收窄,可以咁講保險業已經out啦。咁呢排興乜?搞start up啦!如果真係唔想返朝9晚5返office工,不如試下搵班志同道合嘅朋友一齊出去闖下,隨時自己做埋大老闆。就算失敗,得返嚟嘅寶貴經驗如果之後想跳返入去其他行業亦都非常適用。

相關評論

相關評論