主頁 >名家專欄 > 最寂寞的無敵 孫柏文
名家專欄
A A A

【最寂寞的無敵】跌得快過人民幣的貨幣(孫柏文)(第104期)

2016-12-26 13:00:26

%e5%ad%ab%e6%9f%8f%e6%96%87

呢條題,你第一眼睇,特別如果係追開本欄嘅fan屎,第一個反應必定係:「孫柏文!你一定又想譁眾取寵!人民幣已經跌到嚇親人!如果真係一隻跌得比人民幣快嘅貨幣,一定係啲小國!唔係委內瑞拉,就係津巴布韋!香港人都冇得炒!講來呃字數!」

如果你真係咁諗,首先,我會叫你冷靜啲,唔好用,咁多感嘆號。第二,就係呢個貨幣不但跌得快過人民幣,仲要係大國貨幣,香港人都可以炒。而最緊要係,不但已跌得快過人民幣,仲要如果你係個愛港愛國嘅人,拋空人民幣、買佢跌呢個舉動,過唔到你心中嘅愛國情操,呢隻貨幣你一定拋空得好開心。

咁呢隻貨幣係乜?就係日圓。

雖然近乎冇人講,唯一有報導日圓呢排走勢嘅,都係嗰啲「港女旅遊新聞」,不過對上個六個禮拜,由特朗普當選後高位計,日圓匯美元已貶百分之15。匯「跌到high high」嘅人民幣,日圓都跌咗近百分之10。真係唔講,大家都可能唔知。

點解日圓會咁弱?其實最重要係日央行之前嘅一個政策目標,出台時大家都覺得no big deal,因為日央行話要將日本10年期國債息率控制喺0厘或以下。咁當時大家都對呢個政策提唔起勁嘅最主要原因,係因為日本10年期國債今年好多時候都負利率,市場都幫日央行達成佢嘅政策目標。

點知,特朗普一當選後,市場好似滿希望咁,覺得世界可擺脫以嘅悶氣。即唔需要再借錢畀政府時,補貼佢。結果係全球長年期,十年八載後先還嘅政府借貸,要利息先氹到啲人入局。

即係如果日央行要日本10年期國債0厘,佢唔使望私人資金走去喺呢個息率買。咁日本政府仲係稅收遠低過支出,一定要發債,唯一買家,0厘都肯買,0厘都肯借錢畀日本政府十年,就係日央行本身。不過日央行本身冇錢,佢要買,就只可以靠印鈔票去買。變相無限量化寬鬆。死未?

政策上,日本政府債台高築嘅程度,比希臘、意大利等歐豬國家遠遠遠嚴重。國家還債(即利息開支)嘅負擔,每年要多俾一厘、兩厘,佢哋可即時破產。所以,日央行呢個「要將日本10年期國債息率控制喺0厘或以下」政策目標,係一個鐵一般要做的事。

日圓要大瀉,係個基本分析話一定會發生之事。不過拋空日圓或國債嘅人,死無全屍。今次,唔通係歷代拋空日圓投資者供會多年,一次過俾今轉拋空嘅人標會?一注獨沽日圓!神風沽Yen隊又出動啦!

相關評論

相關評論