主頁 >名家專欄 > 最寂寞的無敵 孫柏文
名家專欄
A A A

【最寂寞的無敵】一注獨贏彩星玩具(孫柏文)(第102期)

2016-12-12 18:00:42

%e5%ad%ab%e6%9f%8f%e6%96%87

三個禮拜前,孫柏文喺呢到寫咗篇題為「一注獨贏買俄鋁(00486.HK)」嘅文。文中,我講過話因冇人預會(起碼啲大行十九分析員冇)特朗普當選,所以喺當選後世界出現劇變時,有好多資產嘅命運會大變。好多資產價格,亦要大幅調整(講真,我最Q憎啲人價跌叫「調整」,on99。我係好正宗咁用呢個字)。

就係因為咁,三個禮拜前,我就推介大家以「一注獨贏」嘅型式買俄鋁。原因有三。一,美國將會喺貿易上,強硬好多去對付大陸。二,俄羅斯由最被美國仇恨,忽然friend過打band。三,美國將會大規模減稅、大興土木、廢除監管惡法,經濟轉強,原材料需求有望上升。

咁加埋,首先大陸鋁產能嚴重過盛,以前大量割喉式傾銷去美國,特朗普上台唔可以再做。鋁價升。不過俄羅斯公司唔會被要求減產,甚至受惠於減少被美國政府喺融資上搞,所以食盡鋁價升嘅着數。

嗰期《策略王》出街後嘅第一個交易日,俄鋁開市賣3.07元。只要你聽聽話話,乖乖咁一注獨贏,五日後,已高見3.63元,升18%。咁上週,我就話過人民幣對美元大插插,理應最受惠嘅股票類別係,一定係出口股。所以,揀股一定係出口股。不過,嗰間公司嘅產品,又唔可以係出口歐洲、英國、日本,因為人民幣對嗰啲貨幣,不但冇跌,仲要微升。

我亦話,出口股近排都係冇運行,除咗外圍經濟表現差外,仲要特朗普話美華貿易,依家係搵美國人笨,咁樣嚇死出口股。所以,要搵嘅股票,係一隻出口股,一隻產品最好只係出口去美國嘅公司,一隻連特朗普都唔會想呢個產品,回流美國本土生產嘅出口股。

符合所有上述條件係邊間公司?今日應承大家分享。咪就係彩星玩具(00869.HK)囉!佢啲貨喺大陸做,八成生意喺美國,仲要玩具低增值,所以連新總統都唔會想攞番美國做。佢亦本身好平,因就算有十億淨現金,每年賺兩億,我落筆呢刻,市值都係冇廿億。賣得平,係因為大家都覺得佢得「忍者龜」玩具,呢隻產品。

呢個仲要大變,因為佢今年初簽番來嘅新卡通Voltron玩具製造權,撞正Voltron年中播時大獲好評。版權持有人Dreamworks,已請編劇寫劇本,電影版在望。而公司本身上月連環回購股份,對上一次已經係2013年,因「忍者龜」翻拍令股價爆升前冇耐,更令人相信公司股價又來大茶飯。

睇得《策略王》,胃口當然大。想食得飽,就要聽聽話話、乖乖咁一注獨贏買彩星玩具!

相關評論

相關評論