主頁 >名家專欄 > 實力取勝 陳承龍
名家專欄
A A A

【實力取勝】港股已被收乾貨(陳承龍)(第180期)

2018-6-7 15:38:37

實力取勝

估計有4萬幾億港元嘅外資,喺過去四個多月流入港股,恒指強烈反彈隨時開始,或已經開始。短期小弟繼續睇個市會升,而且仲係大時代式咁升,因為5月都沽唔落,橫行咗一段時間,6月頭三扒兩撥又夾返上去,如果恒指破到32000點,應該可以再去。呢排科技股好強勢,好似美國蘋果(APPL)同亞馬遜(AMZN)咁,全部都破頂,咁香港上市嘅騰訊(700),作為亞洲科網龍頭冇理由失威,騰訊舊年長期keep住50倍PE,依家先40幾倍,算好吸引咯,走勢亦都似之前APPL創新高後回落嚟唞氣咁,好快又會爆上,一爆就可以帶動港股。嗱,APPL市值就嚟過1萬億,股神巴菲特又越買越多,有啲似佢0708年買中石油(857)個轉走勢,與此同時,巴菲特亦買咗好多中概股,後市仲可以睇好。

從今年2月開始,壞消息一單接一單,例如:加息、中美貿易戰擔憂、北韓地緣政治、意大利和西班牙政局不穩導致脫歐、新興市場貨幣危機、港元弱勢至$7.85、香港同業拆息飆升、中國去槓桿、中國企業債危機、中美喺南海的摩擦、台灣問題、美俄在敘利亞的爭議、伊朗核協議可能作廢⋯⋯嚇到本地投資者沽貨離場居多,以求自保而安心瞓覺,更多人覺得港股會繼續資金外流,但好件事好荒謬咯?

股市梗係有人買,又有人賣。1月尾至今90個交易日,平均每日成交1000億,即係總共9萬億,就當一半係炒出炒入嘅短線炒作,淨低4萬5千億係有人接咗貨,咁,係邊個接貨呢?

香港股市總市值大約36萬億,估計50%係大股東或家族持有,25%係基金同MPF持有,餘下25%(即是9萬億)係本地大戶同散戶持有。最後一群應該就係過去幾個月被嚇走咗,因為大股東應該唔會做太多買賣,基金持貨都應該穩定。所以,買咗本地大小投資者沽出嚟嘅4萬5千億應該係外資,因為佢哋係長線投資,趁壞消息入貨。如果股市流通量就係呢25%即9萬億,而有4萬5千億入咗長線投資嘅外資手上,流通量就會由9萬億變成只有4萬5千億,應該易升。

港股本身呢,亦都有幾個優厚條件,首先就係小米上市,相信唔少投行都會搞返好個氣氛;至於A股,雖然被動買入嘅基金唔係好多,但成件事都好正面,小弟覺得反覆向上嘅機會都好高; 呢排個市好,升勢會蔓延去其他板塊,逐個版塊炒,醫藥呀、教育呀、科網呀,每一個版塊都有落後股,譬如科網,阿里系有阿里健康爆咗上嚟,不如博隻亞博科技控股(8279)啦,佢係阿里系真正嘅金融科技同彩票股,其他二三線股仲係好平,所以後市唔會太差。

相關評論

相關評論